سلیقہ مند بیوی ہر چیز میں شوہر کے آرام و آسائش کے خیال کو مقدم رکھتی ہے‘ رات کو خواہ وہ کتنی ہی دیر سے گھر آئے اسے گرم گرم کھانا دیتی ہے‘ صبح کا ناشتہ بڑے اہتمام و سکون سے کراتی ہے‘ جاڑوں میں گرم پانی تیار رکھتی ہے اور گرمیوں اسے ٹھنڈا پانی پلاتی ہے۔

تجربہ کار بڑی بوڑھیوں کا قول ہے کہ نوجوان بیویاں اپنی آرائش اور بناؤ سنگھار پر تو خاص توجہ دیتی ہیں لیکن اس اہم مسئلے کو اکثر نظرانداز کردیتی ہیں کہ شوہر کے ساتھ خوش اسلوبی سے نباہ کس طرح کیا جائے؟ خوشگوار ازدواجی زندگی بسر کرنے کیلئے اگرچہ میاں بیوی دونوں کو اپنا اپنا حصہ ادا کرنا پڑتا ہے مگر سلیقہ مند عورت اپنی سمجھ بوجھ اور خوش مزاجی سے گھر کو ایک نمونہ جنت بناسکتی ہیں۔ کسی نوجوان لڑکی کی شادی ہوجانا اتنی مشکل چیز نہیں‘ جتنی کہ شادی کے بعد اپنے شریک زندگی کے ساتھ خوش اسلوبی سے نباہ کرنا‘ یہی اس کیلئے سب سے زیادہ توجہ طلب اور اہم چیز ہے۔
اس ضمن میں مندرجہ ذیل چند اشارات سے خاص مدد مل سکتی ہے‘ جنہیں لائحہ عمل بنانا مفید ہوگا:۔
اظہار تشکر و امتنان: تسخیر شوہر کیلئے یہ سب سے پہلی اور تیربہدف تدبیر ہے۔ بیوی کی طرف سے اظہار طمانیت و شکر گزاری کیلئے شوہر اس کی بہت سی ناپسندیدہ باتیں گوارا کرلیتا ہے۔ مثلاً اس کی فضول خرچیاں‘ اس کی آئے دن کی بیماریاں‘ کھانوں میں حد سے زیادہ مرچ مصالحے اور دوسری گھریلو سہل نگاریاں… اس میں شک نہیں کہ غلطیاں اور ناگوار باتیں طرفین کی طرف سے پیدا ہوسکتی ہیں لیکن نباہ کا جذبہ رکھنے والی عورت شوہر کی بہت سی غلطیوں کو خندہ پیشانی سے برداشت کرلیتی ہے بلکہ ان کو اپنا لیتی ہے اور ذرا ذرا سی بات پر کڑھتی نہیں‘ شوہر کی عدم پابندی اوقات‘ بکثرت چائے نوشی یا سگریٹ نوشی‘ متواتر جھلاہٹ یا جلدبازی وغیرہ اسے درہم برہم نہیں کرتی اور وہ ایسی خفیف چیزوں کو ہنس کر ٹال دیتی ہے بلکہ ان سے لطف اندوز ہوتی ہے۔
بیوی کیلئے سب سے زیادہ طمانیت بخش بات یہ ہونی چاہیے کہ وہ اور اس کا گھر شوہر کیلئے مرکز توجہ بن گیا ہے۔ یہ کتنی بڑی بات ہے کہ ایک انسان جو پہلے چاروں طرف بے مقصد سرگرداں رہتا تھا‘ عارضی اور وقتی تقاضوں سے کبھی ایک رخ میں اور کبھی کبھی دوسرے رخ میں بہہ رہا تھا۔ اب سب طرف سے ہٹ کر اور سب چیزوں سے کٹ چھٹ کر ایک منزل مقصودپر آگیا ہے جو اس کا گھر ہے اور جس کی ملکہ اس کی بیوی ہے۔ کیا بیوی کیلئے یہ بات انتہائی کارگزاری کی نہیں کہ وہ شخص جو پہلے کسی کا نہیں تھا۔ اب زندگی بھر کیلئے اس کا ہوکر اس کے زیراثر ہے؟ اس فتح یابی اور کامرانی پر بیوی کو بے حد شکرگزار اور احساس طمانیت سے لبریز ہونا چاہیے۔
اظہار پسندیدگی و قدر شناس: تشکر وطمانیت کے احساس و اظہار کے بعد دوسرا درجہ شوہر کی باتوں پر اظہار پسندیدگی کا ہے۔ وہ عورت جو بات بات پر شوہر کی بات کاٹتی اور اس سے اختلاف رائے ظاہر کرتی ہے اس کے مذاق پر ناک بھوں چڑھاتی اور ہمیشہ اپنی رائے پر اڑی رہتی ہے یا گفتگو میں حاکمانہ لہجہ اختیار کرتی ہے اور اپنی برتری ظاہر کرتی ہے‘ شوہر میں یاس و ناامیدی کا احساس پیدا کردیتی ہے۔ شوہر رفاقت و ہم آہنگی کا بھوکا ہوتا ہے جب یہ چیزیں اسے گھر میں نہیں ملتیں تو آخر کار وہ گھر سے کترانے اور دور دور رہنے لگتا ہے اور اچھے یا بُرے دوستوں میں دل بہلانے کو ترجیح دیتا ہے۔ رفتہ رفتہ میاں بیوی دونوں میں ایک نفسیاتی یا روحانی خلیج حائل ہوجاتی ہے جس کا خمیازہ زیادہ تر بیوی ہی کو بھگتنا پڑتا ہے۔ اس حالت کی ذمہ داری زیادہ تر ناعاقبت اندیش بیوی ہی پر ہوتی ہے۔
شوہر کی آرام و آسائش کا خیال: سلیقہ مند بیوی ہر چیز میں شوہر کے آرام و آسائش کے خیال کو مقدم رکھتی ہے‘ رات کو خواہ وہ کتنی ہی دیر سے گھر آئے اسے گرم گرم کھانا دیتی ہے‘ صبح کا ناشتہ بڑے اہتمام و سکون سے کراتی ہے‘ جاڑوں میں گرم پانی تیار رکھتی ہے اور گرمیوں میں اسے ٹھنڈا پانی پلاتی ہے۔ کھانا کھلاتے وقت اس سے میٹھی میٹھی باتیں کرتی ہے اور خفیف گھریلو جھگڑوں سے اسے پریشان نہیں کرتی۔ اس طرح کام پرجاتے وقت وہ مطمئن ہوکر گھر سے نکلتا ہے اور جب تھکا ماندہ گھر کو لوٹتا ہے تو گھر میں بیوی کی خوش سلیقگی دیکھ کر باغ باغ ہوجاتا ہے۔ کاروباری معاملات میں بھی سمجھدار بیوی اپنے شوہر کو نیک مشورے دیتی ہے اور دونوں میں یگانگت اور اتحاد خیال ترقی پذیر ہوتا ہے۔
ازدواجی زندگی میں ایک دوسرے کا خیال: زندگی کے ناہموارمرحلوں کو کامیابی کے ساتھ طے کرنے کیلئے میاں بیوی دونوں کو ہم قدم ہوکر ایک ہی سمت میں چلنا چاہیے۔ سلیقہ مند بیوی وہی رخ اختیار کرتی ہے جدھر اس کا شوہر گامزن ہے۔ وہ مخالف سمت میں قدم نہیں بڑھاتی بلکہ ہر مرحلے میں شوہر کے ساتھ اشتراک عمل کرکے تمام کٹھن منزلوں میں اس کی ہمدم و ہم ساز اور رفیق راہ بنی رہتی ہے۔ اس طرح زندگی کی گاڑی ہم آہنگی کے ساتھ چلتی رہتی ہے اور منزل مقصود تک سلامتی کے ساتھ دونوں کی رسائی ہوسکتی ہے۔
غرض یہ کہ شوہر کے ساتھ نباہ کے اہم گر یہ ہیں
شکرگزاری‘ گوش ہوش (اس کی باتوں پر کان دھرنا)‘ شوہر کے ہر مرحلے اور بات میں تعاون‘ اس کی غلطیوں میں بھی شرکت‘ یہ یقین واثق کہ رشتہ ازدواج ایک ناقابل شکست رشتہ ہے جسے آخری دم تک قائم رہنا اور قائم رکھنا چاہیے۔ یہ تمام اسلحہ ایسے ہیں جو صرف ایک سلیقہ مند اور خوش قسمت عورت کیلئے کارآمد ہوسکتے ہیں۔